WITO WATOLEWA KWA WANAUME KUWAPA MUDA MZURI NA MAZINGIRA RAFIKI KWA WANAWAKE KUNYONYESHA WATOTO.

Posted on: August 7th, 2023

Na: Nassoro Rashid

       MDC Habari

Halmashauri ya wilaya ya Mkinga kupitia Ofisi ya Mganga Mkuu kwa kushirikiana na wadau wa shirika la World Vision wametoa semina kwa wanaume kuhusu ushiriki wao katika unyonyeshaji wa maziwa ya mama kwa mtoto.

Semina hiyo imetolewa leo Agosti 07, 2023 katika ukumbi mdogo wa Shirika la World Vision uliopo wilayani humo ikiwa ni katika kuadhimisha kilele cha maadhimisho ya wiki ya unyonyeshaji kwa wanaume wenye watoto walio katika umri wa kunyonya ambao ni chini ya miaka miwili (2).

Awali akifungua semina hiyo Mganga Mkuu wa wilaya Dkt. Joseph Ligoha ameeleza kwa upana faida za unyonyeshaji kwa mama na mtoto

zikiwemo kumuepusha mama na hatari ya kupata saratani pamoja na kumsaidia mtoto kukua vizuri kiafya na kiakili.

"Semina hii imelenga kuwafundisha wanaume namna ya kuwajibika katika kusaidia wanawake wanaonyonyesha waweze kupata muda mzuri na mazingira rafiki ya kunyonyesha watoto ili waweze kukua vizuri kiafya". alisema Dkt. Ligoha

Ifahamike kuwa maadhimisho ya unyonyeshaji wa maziwa ya mama kwa mtoto Duniani yalianza tangu Agosti 01, 2023  na kuhitimishwa leo tarehe 07.08.2023 ikiwa na kauli mbiu ya "Saidia Unyonyeshaji, Wezesha Wazazi kulea Watoto  na Kufanya kazi zao kila Siku".