MKUU WA WILAYA YA MKINGA AMPONGEZA MKURUGENZI KWA UTEKELEZAJI MZURI WA AFUA ZA LISHE KWA NGAZI YA KATA YA WILAYA

Posted on: December 7th, 2023

Na: Nassoro Rashid - MDC Habari

Mkuu wa wilaya ya Mkinga Mhe. Kanali Maulid Hassan Surumbu Disemba 07, 2023 amempongeza Mkurugenzi Mtendaji wa Halmashauri Bi. Zahara Msangi kwa utekelezaji mzuri wa afua za lishe kwa ngazi ya Kata na Wilaya.

Akizungumza wakati wa kikao cha kutathmini utekelezaji wa mkataba wa lishe kwa robo ya kwanza Mhe. Surumbu amesema Wilaya kwa sasa ipo vizuri katika utekelezaji wa afua hizo kwa kulinganisha na robo iliyopita.

"Matokeo ya hali ya lishe kupitia kadi alama ya robo ya kwanza inaonesha ni kiasi gani dhana ya ushirikishwaji kuanzia ngazi ya chini hadi juu imeetekelezwa ipasavyo, hakika tukiendelea na utaratibu huu naamini tutazidi kuwa pahala pazuri zaidi, na hii inaonesha kuwa kila mtendaji wa kata amefanya kazi yake vizuri, hivyo nampongeza sana Mkurugenzi na timu yake kwa kusimamia utekelezaji huu". Alisema Mhe. Surumbu.

Kadhalika Mhe. Surumbu ametoa wito kwa wananchi wa wilaya ya Mkinga kuendelea kuwaunga mkono viongozi katika utekelezaji wa afua za lishe kuanzia ngazi ya Kijiji, Kitongoji, Kata mpaka Wilaya ili kuimarisha ongezeko la uelewa wa umuhimu wa lishe kwa watoto na jamii kwa ujumla.

Sambamba na hayo Mkuu huyo wa Wilaya amewapongeza Watendaji wa Kata kwa kuendelea kutekeleza maagizo mbalimbali huku akiwataka kuongeza pia juhudi zaidi na maeneo mengine ikiwemo ufuatiliaji na usimamizi wa ukusanyaji wa mapato ili kuendelea kuukuza uchumi wa wana Mkinga.

Ifahamike utekelezaji wa afua za lishe umekuwa na mchango mkubwa katika ustawi wa maendeleo kwa jamii hivyo Wananchi wanaendelea kuhimizwa kuweka kipaumbele kwenye utekelezaji wa afua mbalimbali nchini ili kuwezesha kuwa na Taifa lenye watu wenye afya na lishe bora ili kufikia malengo endeleevu.